Pagpapalit Ng Pangalan

Nitong mga nakaraang araw, e nabalitaan kong balak daw isulong ang pagpapalit ng pangalan ng EDSA to Cory Avenue. Di ko alam kung tutoo ito, pero bagama’t nanatili ang aking paggalang kay Tita Cory mula sa simula ng kanyang public life hanggang sa huli (tingnan ang artikulo sa ibaba), hindi ko ma-gets ang katuturan ng panukalang ito. Sa katunayan, in general e tutol ako sa pagpapalit ng pangalan ng kalsada o baryo, bayan, siyudad o probinsya man. Wala akong nakikitang mabuting dulot ng pagpapalit ng pangalan, at ang sinasabing layunin nito na pagbibigay-parangal sa taong pinagpangalanan ay madalas na hindi nakakamit.

Tutal karamihan naman ng tao, ke mapa-driver o pedestrian o pulis o residente ng lugar, e Buendia pa rin ang tawag sa Buendia, ano ang katuturan ng pagpalit ng pangalan niya ng Gil Puyat? Don’t get me wrong, si Gil Puyat e importante sa aming mga Kapampangan (http://en.wikipedia.org/wiki/Pampanga#Notable_people_from_Pampanga), pero kung hindi kinakagat ng tao ang kanyang pangalan, at ang Gil Puyat e sa stationery lang ng mga opisina at sa mga karatula ng gusali mo lang makikita pero wala sa kamalayan at puso ng tao, e ano ang saysay nito? At least, ang EDSA ay EDSA, sino man ang tanungin mo. Well, except dun sa mga matatanda na sasagutin ka ng “Highway 54.” Pero kokonti lang sila.

Yung Herrera naman, bakit kailangang palitan ng Rufino? Is one obscure Kastila worthier than another? Hindi ako galit sa mga Kastila, ha? All I’m saying is, hindi ko kilala si Herrera o si Rufino man. Anong meron si Rufino na wala kay Herrera? Nakakalito na nga ang paghahanap ng direksyon at babaan sa Ayala, papalitan mo pa ang pangalan ng Herrera? Ano ang susunod na gagawin nila, papalitan ang pangalan ng Paseo de Roxas?

By the way, bakit hindi na lang sa mga kalsada ng Makati Business District sila maghanap ng ipapangalan kay Gng. Cory?

Isang ikinalulungkot ko ay ang pagpapalit ng pangalan ng Montalban patungong Rodriguez. Sigurado ako, yung mga fans nung Mamang Rodriguez ay may sapat na dahilan para magkaroon ng bayang nakapangalan kay G. Rodriguez (ni hindi ko nga alam kung alin sa mga Rodriguez). Pero kailangan ba namang ang Montalban pa? Ang Montalban ay nakadikit na sa alamat ni Bernardo Carpio. Kung babasahin mo ang kasaysayan ng Pilipinas, lalo na sa panahon ng Katipunan at Himagsikan laban sa mga dayuhan, madalas na nababanggit ang Montalban. Bakit ang isang lugar na napaka-historikal e kailangang palitan ang pangalan? Balik tayo sa unahan ng artikulong ito at isipin: bakit kailangang palitan ang pangalan ng EDSA?