Ngening panaun a ausan ming maleldo, o mal a aldo, miririnan na kami na namang upaya a damdaman mi ya ing kekaming amanung sisuan a mabanggit at mikanta. Ing Iglesia Katolika keni Pampanga, kalupa na naman kareng aliuang lugal, pagamit ne ing katutubung salita da ring tau keng liturhiya ning misa, maging kareng nobena, rosaryo, miyaliwang pangadi.
Bista ma't makalual ya keng opisyal nang liturhiya at literatura ning pisamban, ing "puni' o ausan dang pasyon deng aliwa, metung yang maragul at makabang obra ning literatura keng Kapampangan, a mipaintagun pang makakuang "airplay" balang banua uli na ning tradisyon ning pamamasang puni o pasyon ("pabasa" kareng Tagalug). Napun a Sabado de Gloria, ayalben ke keng Channel 2 y Kim Atienza ketang programa nang "Matang Lawin" a magpalabas tungkul keng pasyon o pamagkakasakit ning Guinung Jesucristo, at minta ya king Baryu Kutud nung nukarin deng magsalibatbat (yang aus mi kareng magpenitensya kening balen mi) magpapaku lang talaga keng krus. Ini palang karelang passion play a gagawan da keng kapalian ning aldo, atin ya pang dialog a papoesia, king Kapampangan mu naman. Mengabit la ping subtitles keng TV screen ban aintindian da naman deng manalbe a ali Kapampangan.
Ngening e na usu ing sarsuela o dramang Kapampangan keng entabladu at e na la usu deng mamoesia, ini nang literatura ning Katolisismo ing ever present a paganaka kareng Kapampangan na atin lang sariling salita.
No comments:
Post a Comment