pera 'sug

pera 'sug, pera kulam

puera asug, puera kulam

Maragul ku pasalamat na ali de pinilit ding Kastila ing karelang salita kekatamung Pilipinu. Uli na nita, etamu meging Spanish speakers, kanya pin anga man ngeni biasa tamung mangapampangan. Den man aliwang lahi balu do pa mu rin deng karelang katutubung salita, antimo deng Tagalug, Ilokanu, Bikolanu, Cebuanu.

Para kareng nationalist historians, in kanung gewa da ring Kastila a e da katamu tirung mangastila ya ing patune na ding Kastila e do buring misanmetung ding Pilipinu bankanita ali la makabulus king pangaalipan o pangakolonya da. Ali ku manwala kanita, uling nung atin lang dapat buriang e mibulus ding Kastila, iti ring Latin Americans, a bukud king mas marakal la, mas marakal la teritoryu, at mas marakal lang palak a kualta kesa keng Pilipinas. Ginto Mexico at Colombia, pilak ning Mexico, Peru at Bolivia, at miyaliwa pang mangadagul a minahan, a angga man ngeni mamie pang ginto't pilak karing taung makatuknang karin, asikan at pastulan ning Argentina, at miyaliwa pang kayamanan. Iti ngan mewala king Espanya anyang memag-rebulusyun la ding Latin Americans. Kumpara kareni, kapatak ya mu ing Pilipinas.