Salamin

Hindi mirror. 'Di tayo magda-dabble sa psychology ngayon.

Eyeglass ito. Spectacles. Salamin sa mata. Ito yung mga corrective glasses na kailangang isuot para muling manumbalik ang normal na paningin ng isang tao. Hindi pinag-uusapan ang mga sunglass o shades na pamporma madalas.

Maraming dahilan kung bakit ayaw ng ibang tao na magsuot ng salamin.

Nagmumukha daw silang nerd. O geek. Bagamat nung bata ako, mukhang genius ka naman daw. Na medyo pinagtatakhan ko ngayon, kasi ang taong pinakakinatawan ng mga genius, si Einstein, e wala namang salamin sa kanyang mga larawan.

Pero bukod pa sa mga juvenile na dahilan, andyan yung mga optical distortions na naidudulot ng salamin na mahirap sa una. Pag minadali ka (o nagmamadali ka) na sinukatan ng salamin, at hindi pinagtyagaang subukin ang iba-ibang lente, maaaring magkaroon ka ng salamin na para kang nasusubsob pag naglalakad. O kaya'y para kang mahuhulog sa hagdan habang pababa dito. Bigla kasi ang pag-iiba ng anggulo, parang pababa ang sahig, at ang baytang ng hagdan ay parang mas malayo. Habang hinihintay mong lumapat ang paa mo, nasubsob ka na.
Wala ring optical correction sa side mo, dun sa peripheral visual area, dahil hindi iyon sakop ng normal na correction lens sa eyeglass. Pagtingin mo sa side, frame ng salamin ang makikita mo. Kailangan mong disiplinahin ang sarili mo na ipaling ang ulo sa direksyon na tinitingnan.
Pero ang mga iyan ay malalampasan mo naman lahat. At unless isa kang photographer o video enthusiast, o alin mang trabahong nangangailangan ng perfect vision, di mo naman masyadong problema ang mga distortion na dulot ng mga lente. Sa pagturo (pointing) na lang sa mga bagay o tao sa harap mo, bagamat nabago ang pwesto ng bagay dahil sa epekto ng salamin, nabago din naman ang anggulo ng braso, kamay at daliri mo, kaya sa bandang huli, tumatama din.

Mayroong mga disadvantage ang pagsasalamin na hindi mo matatakasan. Pag umuulan, kahit gusto mong magpaka-macho at sabihing "di ako magpapayong, malakas ang pulmon ko!" e wala ka ring magagawa dahil palalabuin ng mga patak ng ulan ang mga lente ng salamin mo. Kapag naman galing ka sa aircon na sasakyan, at umuulan, pagbaba mo, yung moisture sa hangin, magko-condense sa mga lente ng iyong salamin at ang mga ito'y magfa-fog-up, mamumuti at hindi ka muna makakakita. Pag ito'y nangyari sa iyo, punasan mo muna ang salamin mo bago ka tumawid ng kalsada.
Kapag nakasalamin ka at sumasakay ka sa public transportation, inaalala mo ring baka matabig at malaglag ang iyong salamin. Pag nalaglag ito at naapakan ng mga nagmamadaling pasahero, siguradong ito'y wasak. Ito ang dahilan kung bakit mayroon akong back-up, isang salamin na pareho ng sukat ng kasalukuyan kong suot. Pag walang pambili, yung lumang salamin na lang, yung pinalitan ng kasalukuyan, yun ang inilalagay ko sa bag. Magkalintikan man, may salamin akong pang-emergency.
Pag umiinom ka ng kape, magpa-fog ang salamin mo. Kapag umiinom ka naman ng softdrinks sa fastfood store, yung softdrink na nandoon sa gilid ng baso, kapag dumikit sa salamin mo, ang hirap alisin. Pag pinunasan mo, kakalat lang, at lalabo ang lente mo.
Hassle din ang salamin kapag pawisin ka. Pag nagkapawis ka sa gilid ng mata, hindi mo mapunasan kaagad, kailangan mo munang maghubad ng salamin. Minsan, ang pawis mo ay tutulay sa frame ng salamin mo at makakarating sa ibaba ng mga lente (lowest point kasi). Yung malaking patak ng pawis, maiipon at para ka nang naka-doble bista (bifocals).
Harang ang salamin sa mga naghahalikan, o kahit pag hahalikan mo lang ang batang maliit. Bukod kasi sa pisikal na tatama/sasayad siya sa bata, e hilig ding hablutin ng mga bata ang salamin mo sa mata. Hindi ka na nga nakahalik, na-disarmahan ka pa.
Mahirap ang nakasalamin pag naglalaro ng contact sports kagaya ng basketball. Syempre, hindi pwedeng mag-boksing nang seryosohan (hard sparring, etc.) pag nakasalamin, for safety reasons.

Ang pinakamabigat? Di ka na magiging piloto, at di ka masyadong papansinin ng girls.