Sports Team Names, Female Version

Kung nakakapanood ka ng collegiate sports sa Pilipinas, alam mo na siguro na ang mga koponan o teams ay may mga pangalang nakadugtong doon sa pangalan ng mismong paaralan nila. Halimbawa, UP Maroons, o UE Warriors. Hindi naman ito unique sa Pilipinas, dahil sa mga kolehiyo sa Amerika e ganyan din. Sa katunayan, ligtas nang sabihin na doon lang naman natin ginaya iyan. Ganyan din ang mga koponang propesyonal, maging sa Amerika man o dito. May LA Lakers, may Ginebra Gin Kings. May Boston Bruins, may Crispa Redmanizers.

Pero ang mga pangalan ng mga propesyonal na koponan sa Pilipinas ay may pagka-komersyal, pangalan na ang layunin ay ipaalala sa atin kung anong produkto ang ibinebenta nila. Kaya may Gin Kings (Ginebra), TJ Hotdogs (Purefoods), Ice Cream Makers (Magnolia), Painters (YCO), Beermen (San Miguel), Rhum Makers (Anejo o Tanduay). Yung iba dito, positibo ang dating (ibig sabihin, nagpapahayag ng lakas), kagaya ng Tamaraws (Toyota dati) at Barako (Red Bull). Pero ang karamihan ay masasabi mong "lame". Saan ka naman nakakita ng koponang tinawag na Ice Cream Makers kundi dito lang? At ayaw na ayaw ng mga Kano na matawag na "Hotdog", kasi ang hotdog e yung player na mayabang, pasikat sa coach, scouts at fans, buwaya sa bola at walang alam kundi mag-exhibition at umiskor. Pag hotdog ka, hirap kang magpa-recruit sa mga top tier colleges o sa propesyonal teams, kasi ang impresyon ng mga coach sa iyo, mayabang ka at kulang sa disiplina at mahirap pasunurin sa isang sistema ng opensa at depensa. Pero dito sa atin, ang Hotdog e pangalan pa ng koponan.

Mas may hawig ang mga college team names natin dun sa kanilang pinaghugutan sa Amerika. Ang mga pangalan na iyan ay karaniwang hango sa mga hayop (Eagles, Tigers, Lions, Tamaraws, Falcons, Cardinals, Stags, Bulldogs). Pero mayroon din namang galing sa tao (Archers, Warriors, Knights, Bombers). Ang mga pangalan sa mga sports teams sa kolehiyo (o maging sa karamihang mga propesyonal na koponan sa Amerika) ay may layuning mag-project ng imahe ng bilis at lakas, mga katangian ng sinumang sumasali sa top-level na competitive sports. Kaya sila'y karaniwang pangalan ng mga hayop na maninila o mandaragit, o kaya nama'y tao na ang aktibidad ay may kinalaman sa digmaan.

Ngayon, alam din natin na ang mga kolehiyo ay mayroon na ring mga women's teams, dahil matagal-tagal na rin namang laganap ang pagsali sa sport ng mga estudyanteng kababaihan. Ang lahat ng ito ay maganda, maliban lang sa isang bagay.

Tila yata may pagka-awkward yung ibang mga pangalan na ibinibigay natin sa mga sports teams natin na pambabae.

Napansin ko kasi, parang nagkakasya na lang sila sa pagkakabit ng katagang "Lady" sa pangalan ng kanilang team na panlalaki. Hindi ito masama basta nasa lugar, sa katunayan, sa Amerika may koponan na Lady Vols. Ang problema lang, pag ang pangalan na kinabitan ng lady ay nagreresulta sa isang kontradiksyon. O yung tinatawag na oxymoron.

Halimbawa: Lady Stags

Ang stag e lalaking usa (male deer). Mas ginagamit ito sa British usage, kasi ang pinapaborang salita ng mga Kano ay "buck". Whatever, basta ang stag e gender-specific na pangalan ng hayop. Kabitan mo ang stag ng lady, e... ewan. E ano ang isusunod? Lady Bulls? Lady Boars? Lady Roosters?

Ganoon din ang Lady Knights, kasi historically, puro lalaki lang naman ang mga knights. Huwag sanang ikagagalit ng mga babae, pero kung (kung) nagkaroon man ng knight na babae, ito ay hindi normal. Isang exception.

Ano ang halimbawa ng tamang pangalan ng pambabaeng sports team?

UST Tigresses. Female ng tiger, may imahe rin ng lakas (tigre e!). Perfect.
Ganoon din San Beda Red Lionesses. Parang sa UST, ibang hayop nga lang.

Kaya lang masyadong madali ang dalawang ito. Gimme, ika nga. Mayroon naman kasi talagang known female forms ang tiger at lion. E paano kung "Wild Dogs" ang pangalan ng panlalaking team ninyo? E di ang pambabae, "Wild Bitches"? Parang may pagka-pornographic, ano? Babalik na lang sa Lady Dogs, tutal generic na rin naman ang gamit sa dog, pwede nang male at female (yes, I have too much time in my hands). Buti na lang hindi fashionable na gamitin ang Dogs.

Eto ang paborito ko.

UE Amazons. May koneksyon na nga sa Warriors, may imahe na nga ng lakas, pambabae pa talaga.